謝婷婷同Marvel超級英雄「鷹眼」謝洛美維納（Jeremy Renner）呢段霧水情緣，故事由去年12月男方來港出席活動開始。相識滿天下嘅鷹眼，約謝婷婷揸住Harley穿梭尖沙咀到中環鬧市，兩人甜蜜兜風似足情侶一樣，兩人分別喺社交網公開兜風片段，就係咁開始傳lu。

【緣起……一齊返酒店】
當時更有報道稱，34歲嘅婷婷同戴尚安分手後，同45歲嘅鷹眼dating。鷹眼來港之旅，與婷婷去中環拍拖歎茶，仲一齊返酒店……

數日之後，即12月3日，婷婷出席活動時被追問係咪同鷹眼date緊？婷婷否認。咁覺得Jeremy份人點先？佢就話：「佢係一個好Charm好有風度嘅人。」有冇發展機會？佢諗咗陣，甜笑話：「Maybe。」佢仲表示有keep住聯絡，講完面都紅晒。

【預告明年同鷹眼慶生日】
今年1月，鷹眼46歲生日前幾日，婷婷在社交網留言祝福，鷹眼亦有留言回覆話：「Cool，Thank you!!!!!」之後婷婷受訪時話：「正日都有同佢講happy birthday！」

問到有冇進一步發展？婷婷話：「要慢慢做吓朋友先。」咁o依家係咪曖昧階段？「唔知呢，等我再清楚啲先話你知。」有冇同鷹眼慶祝生日？婷婷話：「佢喺美國，冇同佢慶祝，同佢講咗自己工作唔得閒，下年生日先再慶祝。」

【自爆情人節前赴L.A.見面】
話口未完，今年2月15日，婷婷到紐約出席時裝周，問佢有否趁機搵鷹眼？佢清楚知道對方身處洛杉磯：「其實我喺L.A.過嚟。」又表示已與Jeremy見面，但冇一起過情人節。咁係咪真係拍拖？婷婷甜笑：「唔答。」

【自爆已見鷹眼家長】
都係發生喺2月，婷婷返港出席活動，直認雙方關係大躍進，更見過對方嘅家長，又稱：「冇特別慶祝，情人節前夕見過面。」係咪兩人首個情人節？「冇特別慶祝情人節。」咁發展成點？佢話：「唔好咁快，俾多啲時間。就係爭時間。」

當時婷婷仲話，Jeremy好支持佢喺美國發展……跟住講番見家長，咁人哋父母對佢有咩意見？「同佢哋關係幾好。」咁去到談婚論嫁未？佢好驚訝咁話：「OH MY GOD，未係呢個step。」

【自爆見埋鷹眼個女】
4月，婷婷去中環活動時，又係大方講下鷹眼，佢話希望遲啲先拍拖，多啲時間做自己嘢。於是大家問佢驚唔驚Jeremy唔會等你？婷婷話：「我唔擔心。」最搞笑係同一時間四哥經過會場，問四哥認識唔識Jeremy呢？婷婷有啲尷尬搶答：「哎呀，佢唔知架。」反而四哥一臉好奇反問：「邊個嚟架？」

5月，婷婷去邵氏影城出席卡地亞派對，自爆同鷹眼四歲女兒關係好好，又大讚佢獨立。

6月，婷婷出席一時裝活動，分享入廚樂，問到會否為鷹眼下廚？婷婷笑言：「今次我第一次成功，要練習多幾次。o依家都計劃緊7月去美國。」

【最後一次提……】
6月23日，婷婷到中環出席護膚活動，記者問到佢同「鷹眼」拍拖生活，佢未有否認戀情：「我喺L.A.嗰邊專心返學，有時間見面，喺屋企睇吓戲，食吓飯，佢都專心佢音樂，會唱歌、彈琴、彈結他，佢練緊嗰時我會專心聽。」

分隔兩地，會否夾時間見？婷婷話：「我冇提議，自己工作為先，都唔知佢支唔支持，有時佢覺得我只管工作唔理佢，但自己搏殺期，唔想做嘢分心，隔咁遠都係好，感覺佢想有個人喺身邊想穩定。」

咁都唔係拍拖……

▓⚗_⚗▓