英格蘭首輪對巴拉圭賽後，唔少遠道而來捧場嘅英格蘭球迷都話，球隊「瘀血」分子，包括高佬前鋒高治，一日成為球隊正選，都唔太奢望球隊攞到乜嘢成績。班英格蘭球迷仲話，球隊最終可以出線次圈，但得失球差未必及得上同組嘅瑞典。
𠵱家就打咗2輪比賽嘞，照計話英格蘭得失球差不及瑞典而得次名出線嘅可能性，已經唔存在；事關進行呢場尾輪賽事之前，英格蘭多瑞典2分，英軍只要打和都可以首名出線，除非輸波啫。

瑞典嗰邊，上場對巴拉圭，憑龍格保完場前奠勝，先有今日打和都可以得到出線資格嘅優勢；當時華度並無走去問吓瑞典球迷點睇對英格蘭時嘅機會，反而捉住啲巴拉圭行家，比較一吓瑞、英2軍仲實際。佢哋話巴拉圭對住瑞典時踢得明顯較好，但又發覺其實瑞、英兩軍風格好相似，可能大家都有個瑞典人做教頭嘅關係。
咁係咪可以秤先英格蘭呢？又唔係喎，佢哋話真正為隊波感受到壓力嘅，都係對瑞典嗰場，始終英軍都係靠巴拉圭後衞擺烏龍送禮至贏到，瑞典就擺明車馬要爭取入球，亦真係做得到。華度都認為呢場英軍若能今日轉讓波唔化算，畢竟大家都可能會睇住早幾個鐘開波嘅A組戰果做人，睇吓點走線避開德國。文：華度
採訪隊推介
華度心水：瑞典（下盤）