炒車重傷 影相穿頭 鬧交度橋
草蜢30年血淚當笑話
三一萬能俠永遠都要三位一體,才能度過難關,戰勝敵人。
草蜢攜手走過三十載,也早已是一體,共富貴又共患難。
印象難忘是1989年經歷險過剃頭的車禍,三人橫倒公路上,沒有萬能俠打救,惟有自救。
誰來指揮救援?
蔡一智笑開懷:「有人叫我哋即刻擰轉面,唔好俾人睇到!」
蔡一傑搶答:「你哋撞到六神無主嘛!」
蘇志威下結論:「草蜢係只顧儀態,不顧生死嘅。」
草蜢自己做萬能俠,人生旅途互有提點,今日聚首話當年,笑談風雨,「我們仨」缺一不可。 撰文:王連連
三個大男人談過去,不會覺得肉麻,草蜢緬懷昔日時光,話題滔滔不絕,臉上掛滿童真,以往同甘共苦的日子,現在就變成三人的笑話。
細:蘇志威 智:蔡一智 傑:蔡一傑
細:「細個住屋邨,我哋得閒會去七座後面煨番薯,我仲記得有人睇煙花睇到跌穿頭。」
傑:「嗰個係我囉,當時我哋去Regent出面睇煙花,係你要影多啲景就要我退後啲影,點知跌咗入伊利沙伯醫院。」
傑:「其實出到第三隻碟都唔係有錢,仲要住喺屋邨,半夜避開晒fans,跟住我哋會打開鐵閘唞涼,拎支啤酒聽歌、食花生,半夜最舒服。」
智:「我哋會傾下一隻唱片又要點做,啲橋就喺度嚟。」
傑:「嗰段時間我哋夾錢買咗架單門錢七,有次做完騷,ACHall門口四、五十個歌迷走出嚟圍住架車,迫到車門都開唔到。我隻手都攝咗入沙板,唉!個沙板重凹埋。」
智:「仲有車頂同鎖匙件事呢。」
傑:「係呀,有個歌迷坐喺車頂,嗰架新車嚟㗎嘛,萬事都落返嚟先講啦,車頂都凹埋呀,跟住又有個歌迷用鎖匙喺車門刮ILoveYou,睇到都唔知喊定笑好。」
細:「89年我哋撞車都幾難忘㗎!」(編註:當時阿細和阿智需住院留醫,阿細下巴受傷,飲水時會在傷口裏流出來,需縫針。阿智事發時被彈出車外,膊頭和手指需接受物理治療。)
傑:「當時黃昏六點幾,係喺東區走廊撞車,大家撞到一仆一碌。」
智:「最記得有人大叫:『即刻擰轉面,唔好俾人睇到。』」
傑:「咁係吖嘛,當時我最清醒,要顧儀態㗎嘛,你哋血流披面,點畀得人睇?草蜢咁貪靚,爆晒缸咁肉酸,梗係即刻趴低擰轉面,俾人見到咁點算?」
細:「呢啲咪叫不顧生死,只顧儀態囉。」
智:「我哋成日鬧交,有乜都鬧得一餐,不過冇隔夜仇,大家好清楚對方性格,衰啲講幾時臭幾時香都知,即使monthlyperiod都知,一切瞭如指掌。」
傑:「好似老婆老公囉。」
智:「雖然我哋冇諗過做一世朋友,但我哋一行埋就有晒默契。」
草蜢仔變成軟硬天師口中的老餅罐,阿智、阿細已成家立室,人生充實美滿。初為人父的阿智愛妻護女心切,刻意避開家事問題,傑仔落單不諱言仍追求真愛,但緣份未到也樂享自由。
細:「我唔講得係世界上最幸福嘅人,但我已好滿足,生咗個女睇事對人都唔同咗,個人成熟啲。」
智:「我覺得係一個新階段,𠵱家生活已經好圓滿,仲多咗好多能量,人生叫真正開始,好似大學畢業,正式踏入社會咁。雖然我做咗爸爸同丈夫,但草蜢喺我心目中都係咁重要,三樣嘢都一視同仁。」
傑:「佢哋兩個生命中都有變化,當哥哥宣布結婚後,我覺得有段時間被孤立,得番自己,但呢幾個月為演唱會合作,我覺得佢哋唔可以離開我,直到永遠。再講,愛情真係好講緣份,一切隨遇而安,人生唔止愛情,冇又何必強求呢?」
智:「梗係,再追求真係無止境嘅欲望。」
傑:「人愈大就愈想追求簡單生活,唔係要求住洋樓、養番狗咁嘅物質,見過晒又如何?如果可以喺街篤吓魚蛋、食雲吞麵,自在啲就夠。」
攝影:仇志德
場地提供:GatewayHotelLaBrasserie
服裝提供:11Finger
化妝、髮型:11Finger、DJRemus、SoBoss