今日是每年一度的「冬至」，俗語有云「冬大過年」，意指冬至比農曆新年更重要。中國人根據傳統，今日都會一家人共聚一堂吃團圓飯，所以每逢冬至，街市亦定必熱鬧非常。在九龍城街市，今日由早上開始便人來人往，到街市買雞的市民絡繹不絕，不少檔口都大排長龍，但亦有檔主覺得今年生意不及去年。

雞檔周華記的玲姐表示：「今日好多人嚟，比平日多，平日入80-90隻雞，今天入了200多隻雞，同去年做冬相若，啲客買雞嚟做冬同拜神，有客最多一買買四隻。啲熟客早幾日前已經講咗要留雞，今日來貨比平日貴咗一成，自己賣都加番相應價錢，不過啲客最緊要有新鮮雞食。」玲姐稱，今日大時大節，平日早上七時半開工，今早六時就要開工，「連啲仔女呀孫呀都要嚟幫手，幾個鐘都要嚟，做到12點幾都未食晏，寧願賣多幾隻雞，估做到下午五點零就收工，自己屋企都要斬隻雞做節，一齊食飯好開心」。

不過，新榮海鮮的冼小姐稱：「今日生意好淡，同平日嘅周末差不多，比去年做冬少一成，因為挨近周末，啲客連埋聖誕放假去晒旅行，早兩日問啲客，好多都話唔喺香港。」冼小姐表示，今年來貨都有加價，約十元八塊，但自己則不敢相應加價，「而家最好賣都係魚蝦蟹，早兩日都有邊爐同燒嘢食客，今日就主要係煮飯客，但整體嚟講都係淡」。

冼小姐舉例稱，大東星斑800元一條，以往好快賣清光，但現在到中午「一條都賣唔出」，細條的星斑反而有人買。「有為冬至訂多咗貨，家陣失晒預算，早咗開工，都唔敢早收，賣得幾多得幾多，希望午後啲人玩完就嚟買餸煮飯啦！」冼小姐稱，以往做冬早上最多客，排隊買海鮮排到出門口。

在九龍城街市大樓外的新興肉檔吳太亦謂，生意比往年做冬少約三成，同平時的周末差不多，「可能都係驚豬瘟，供應商都唔敢加價，我哋都冇加，但都冇話要減價促銷，佢幾錢嚟我幾錢賣」。吳太對今日生意不敢樂觀，「今日賣得晒啲貨都偷笑，冇話早收啦」，又話今時今日市民做冬觀念不濃厚，「係啲老人家要拜神啫，啲後生都係打邊爐啦」。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568