蕭正楠同朱晨麗今日喺洪水橋出席「魔幻聖誕繽紛工房」，蕭正楠表示今晚要開工開到凌晨，所以冇得同女友黃翠如過平安夜，會唔會交換禮物？佢話：「唔使交換，我都一定送。（送戒指？）我諗唔會喺呢啲時候嚇佢，聖誕節梗係送啲實用啲嘢。」

對於曹永廉喺節目《公公出埠》，疑不滿被蕭正楠同黃浩然夾擊，問蕭正楠有冇o氹番阿廉？佢笑住話：「唔使o氹，o氹佢即係縱佢，我唔同佢講嘢幾日，佢已經成日囉囉攣，我哋第二日已經冇事，本身佢有啲唔舒服，我哋兩把嘴係咁話佢，佢又搭唔到嘴，佢覺得喺觀眾面前好（火羅），咪有啲唔開心囉！不過呢次係係我人生出trip嘅top3。」top1、2有冇翠如份0架？佢話：「我梗係留番啲位畀佢啦！」

朱晨麗透露今晚約咗同學BBQ，問到有冇緋聞男友何廣沛？佢話：「未邀請佢喎，佢都唔係我同學，今晚係全女班。」想唔想識男仔？佢表示：「我一啲都唔lonely，一直忙工作都冇乜私人時間，我希望農曆年可以返蘇州陪屋企人，因為幾年冇返去。」

講到佢同何廣沛分別角逐無綫嘅「最佳男、女配角」，朱晨麗即刻話撐對方：「佢係我嘅劇中拍檔，由初初未拿捏到，到3個月見到大家嘅成長，我支持佢0架，我對自己都有信心，但係今年競爭好大，希望大家支持我。」

更多娛聞，喺晒《娛果》
http://fb.com/appledailyent