近期唔少高息工業股嘅股價表現良好，好似同得仕（518）就唔經唔覺升咗好多。噚日靚女經紀提醒小初，話做燈飾嘅瑩輝集團（1163）派息率都好高，有成16厘咁多，聽講呢個星期好似有證券界人士上去東莞睇廠，所以叫小初留意吓。
小初睇番張圖，發覺瑩輝股價自1月中開始有異動，近日突破咗60仙水平，而且成交亦增加。不過，小初記得呢間公司向來唔多炒作，亦唔見有莊家活動，今次成交轉活，可能係虛火，況且去睇廠都唔等於一定有得炒。不過間公司都算企理，買咗亦唔使心驚驚。
講起心驚驚，小初噚日聽經紀陳吩咐，一開市就撲入去買冠華國際（539），點知，一跟就摸頂，旋即回落至57仙，嚇到小初腳震震，好彩最後收61仙打平手。不過仍較停牌前升17%。
經紀陳安慰小初，話隻股跌唔落，即係重未散，唔使驚。佢咁清楚，唔通佢係莊？