無論特首林鄭月娥抑或特區政府官員，開口埋口都係大灣區。明嘅，習近平親自制訂嘅國策吖嘛，當然要大鑼大鼓推動以表忠，否則林鄭真係咁易可以「與習同行」？身在北京出席「中國發展高層論壇2019」嘅林鄭，今朝以英語演講時，離不開硬銷大灣區，甚至話相信大灣區城市群，有潛力成為「東方華爾街」同「東方矽谷」。唔通擦鞋真係無底線，可以將大灣區一味靠吹嘅評論，視而不見？

話說林鄭席間形容大灣區嘅基建聯繫非常好，而喺世界保護主義抬頭下，大灣區涉及「一國兩制」同3個關稅區，正正係不同特色經濟體系合作嘅實際示範，偏偏佢就冇提到，唔少港人對於被中央規劃下，香港一國兩制或受損幾咁憂心。

林鄭重提特區政府希望喺大灣區做好聯繫人角色，話香港有世界級大學、法治以及對知識產權嘅保護及國際連繫等，都係香港貢獻大灣區創科發展嘅優勢，相信只要配合香港自身嘅資本市場，大灣區城市群有潛力成為「東方矽谷」或「東方華爾街」（In my view, the Greater Bay Area has good potential to become not only the Silicon Valley of the East but also Silicon Valley and Wall Street within the same city cluster）。

林鄭同時又畀香港「溫韾提示」，指香港唔可以安於現狀，支柱產業競爭好激烈，例如香港貨櫃碼頭吞吐量，已經由2000年嘅世界第一。跌至去年排第七，香港經濟增長亦受土地同勞動力不足影響，總之結論就係：大灣區會為香港提供好多新機會。如果有大灣區特首，林鄭當之無愧！

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI