港股繼續受外圍拖累，噚日甫開市已造低近百點，之後就在10000關口爭持，最低潮時，恒指下跌141點，午後市勢雖回升，但收市仍下跌69點，成交52億元，9月期指更低水51點。大市已連跌5日，雖然由高位10479回落，亦只不過500點，但市場觀望氣氛濃厚。照計跌咗咁多日，都會出現反彈，若恒指上番10日同20日線之上，形勢就會有轉機；更樂觀點，若能衝破10479，就可確認升勢重現，未來幾日，將係關鍵時刻。
噚日大市雖跌，但上升股（不計認股證）有173隻，比前日的159隻為多，細價股有到底轉強之勢。表現較突出係辰達永安（1189），高收2.7仙，升3個位，升幅12.5%，成交2.5億股。辰達永安大跌後，反彈係好正常，陳氏兄弟一路減持，貨源應已落入強者手中，減持得愈多，歸邊的情況愈甚，股價日後上升的動力就愈大。
中旅（308）收1.3元，跌1仙，現水平吸入，係諗住揸中線，下一個升浪，股價可見1.5元，財息兼收。另一隻可揸中線嘅股票係建溢集團（638），以現價1.96元計，往績PE7.5倍，息率5.1厘，亦有機會賺價賺息。

預測息率約6厘
個多月前，本欄曾推介候低買入建溢，現時其走勢正形成雙底，且反覆回升，現價入市風險應不大，若雙底形態成立，則衝破頸線（2.3元）阻力，以量度升幅計，上升目標將指向2.8元。
建溢主要產銷高檔玩具、摩打和光碟。最新的發展係集團光碟生產線已遷往韶關，並由兩線增至6條，年產量因此增至5000萬片。上年度，光碟業務虧損160萬元，產能加強及降低成本後，預期03年收支平衡，04年有盈利。
建溢近期接單增加，手上定單已排期至明年春，預期現年度的營業額會有15%的增長，摩打業務更會有突出表現。02年3月止年度，建溢獲利9803萬元，上升15.7%；03年度，盈利料上升至1.2億元，每股盈利0.3元，預測PE6.5倍，息率約6厘，以半年至1年為期，目標價2.6至2.8元。
郭兆誠