越秀地產（123）最近落重本，喺中環地鐵站內賣咗成條路咁長嘅燈箱廣告，主要推銷準備賣畀越秀房託（405）嘅廣州國際金融中心。鬼咩，市值得41億嘅越房打算用134億人仔蛇吞廣州國金呢隻象，仲講到明遲吓要配售單位籌錢科水，梗係要搞吓形象工程，鼓勵越房股東批准單刁啦。
越房下星期一（23號）召開股東特別大會要求小股東投票通過呢單交易，越秀只係揸住越房35.6%，街貨有成六成四，要掌握佢哋嘅投票取態一啲都唔容易，公司寄畀股東嗰本交易通函仲電話簿咁厚，都唔知有冇人真係睇。

據聞，越秀同越房都擔心下星期一唔夠票，令到交易泡湯，最近不停約見投資者、分析員同財經演員，希望佢哋幫吓手，再喺金融重地中環地鐵站大賣廣告提升形象，認真不惜工本。