最低工資推行後基層打工仔有人工加，不過在監獄服刑嘅犯人，就唔受惠，皆因入獄後要強制勞動，雖然日日要工作，都唔算係真正打工。在監獄內想加人工，最正路嘅手法就係畀心機做好份「工」博升職，八方聽聞近日赤柱有位名震香港嘅極度重犯，因為博紮唔成，搞到向懲教署長投訴。
呢位極度重犯一向身體唔好，八方聽聞佢近日轉咗工場，去做成衣。按照規矩，轉工場做新工種，即係生手，一律要由低做起，自然要減人工；據講重犯新崗位係負責剪線頭，佢不滿人工低，要求升呢去車衣，但係懲教署阿Sir見佢連剪線頭都交唔足貨，揸正嚟做，唔畀佢升職。重犯認為唔公道，向署方投訴，仲要求見署長伸寃。據講上頭認為署方人員決定合理，所以重犯反對無效，繼續做剪線頭。