馬黎珈而（前名黎姿，Gigi）今日以CosMax醫學美容行政總裁身份到尖沙嘴，為九龍首間旗艦店舉行揭幕禮，圈中好友張可頤、林保怡、向海嵐、伍詠薇同張晉等到賀。Gigi致辭時非常感觸，佢表示從人手管理到會計財務，當中學到好多知識，亦希望做到良心企業醫學美容，Gigi話：「我要特别感激身邊兩位重要人，第一個係我細佬，因為佢開始咗呢個醫學美容平台，畀我發揮創造自己嘅空間。第二個係我老公，佢畀咗好多自由空間我去發揮創造自己空間，發展今日更好嘅Gigi。」

經已離開幕前工作十幾年，Gigi感激一眾圈內朋友友誼不變，更專誠抽空見證揭幕。切餅後，兩位神秘嘉賓鄭伊健及林曉峰拎住香檳向《古惑仔》系列電影中演細細粒嘅Gigi道賀，Gigi感動到眼泛淚光：「呢兩個真係請都請唔到，唔好要我喊啦！」伊健即提議不如一齊入內飲食，而林曉峰笑說：「頭先佢哋叫我哋應該要調轉支香賓嚟拎，話咁樣Gigi會笑。」Gigi即忍不住笑說：「o依家又唔係劈友。」跟一眾嘉賓祝酒後，Gigi上前逐一擁抱答謝。

對於伊健及林曉峰神秘現身，Gigi表示非常驚喜，跟伊健已多年沒有見面，反而同蒙嘉慧見得多：「年紀大咗，感動反而唔會喊，喺心入面有種感動唔能夠用說話嚟形容。」講到公司發展，佢指公司已經上市，所以會繼續前進作更多元化發展，大家拭目以待。

精選娛聞，喺晒《娛果》
http://fb.com/appledailyent