林雅詩同仙樂都今日喺中環出席《第十屆香港電單車節》，谷胸現身嘅林雅詩早前因為腸胃不適入院，加上面對婚姻破裂危機，今日出席活動心情似乎麻麻哋。

林雅詩解釋返當日入院係因為急性腸胃炎，至於老公有冇問候過佢？佢話：「佢唔知，只係睇咗報道，不過之後都有打過畀我，我同佢解釋返件事。」問到係慰問定質問？林雅詩話：「普通啦。」至於早前佢喺facebook留言「一個簡單嘅簽名，到落筆嘅一刻，簡直心如刀割。」似乎已經簽紙離婚，林雅詩就回應話：「o依家交晒畀律師處理，我自己嗰邊已經簽咗，唔知道佢幾時會簽。」咁係咪已經心死？佢話：「都會㗎，其實我好想好好哋傾下，但係對方都唔肯傾，真係好搞笑。」

林雅詩又話出院之後去咗廣州做嘢，所以好多日都冇同囝囝見面，間中都有用視像通訊：「同佢傾完電話仲心噏，因為佢不停喊，唔知點解突然去咗婆婆屋企，我小朋友係好擔心，但係佢都好明白事理，好多嘢我唔敢同佢解釋，因為我唔敢面對，都要等我媽咪同佢講。」佢亦都承認自己係好大壓力，但係就未至於要去睇心理醫生。至於前幾日有關離婚撫養權嘅政策改革，林雅詩都話有擔心，希望囝囝可以由自己照顧。

同場嘅仙樂都就話最近重錄即將推出嘅專輯，仲搵咗班80後為佢做監製：「我覺得自己把聲都年輕咗，今次係陽光嘅style，早排仲拍咗MV，三日花咗五位數字。」對於林雅詩面臨婚姻危機，仙樂都話：「朋友關心下就夠，唔會詳細問佢乜事。好似我重錄首歌咁，佢都有問我，雖然佢好多壓力，但係都比好多正能量我。」