公關小YY喺年初辭咗份公關職位，走咗去瑞士讀hospitalitymanagement，眨吓眼就以全班第一名成績畢業，攞咗個「最佳態度獎」。但張文憑就未有住，學校規定佢哋上完九個月嘅課程之後，要在酒店實習最少三個月，得到酒店服務證明書，先至可以領取畢業文憑。小YY一班三十幾人，全部得到不同城市酒店嘅實習職位，班上中國學生返晒上海北京及其他城市，一位平時唔多顯眼嘅印度男生對小YY講：「如果你搵唔到酒店實習，可以到孟買搵我。」小YY話：「你返去孟買實習咩？」印度男生話：「正是，我老竇就係一間大酒店嘅業主。」小YY嚇咗一跳，班上啲大陸學生，已經好多酒店高層關係，估唔到呢位印度男生，可能會係未來嘅大酒店繼承人㖭！

小YY一位台灣女同學，本是空中小姐，讀完就返台北一間五星酒店做VIP服務部。至於佢自己咯喎，唔肯返香港，要去倫敦闖天下，見識見識世界級服務打世界波，飛過去某大五星級酒店面試，竟然被錄取做實習生，一月就去倫敦上工，歡喜到見牙唔見眼，睇嚟佢間學校的確有啲名氣，交貴學費確係一分錢一分貨也。
讀完酒店管理課程，小YY學到乜嘢真材實料，暫時唔知，但已有輕微職業病，就係去酒店食飯，佢好注意啲夥計點樣擺刀叉餐巾及斟酒手法，彈吓呢個唔得，讚吓嗰個手法正宗。理論就多嘞，將來佢自己做就知辛苦。