王祖藍今日現身澳門新濠影匯，出席《賞金尋龍》大型恐龍互動展擔任特別嘉賓，早前仲替活動預先拍咗條宣傳短片，當中扮演一名搞笑特工追尋恐龍蹤影。

日前祖藍38歲正日生日，佢表示當日要開工，同杜麗莎一齊拍節目：「但好好彩太太、外母同媽咪都得閒一齊過，雖然係工作下(過生日)，但都好開心。」講到佢喺大陸嘅節目《奔跑吧兄弟》入面一班成員拍片生日賀佢生日兼催生仔，祖藍話多謝佢哋咁有心：「呢個都係我生日願望，希望今年發力唔好辜負佢哋一班朋友嘅心意，因為佢哋個個都生晒小朋友，我哋就嚟冇晒話題。」

祖藍坦言同太太李亞男都已經準備好，希望今年可以有好消息，問到工作咁忙，可抽到時間造人？佢話：「唔得都要得㗎喇，都要抽啲時間出嚟。」仲講笑話o依家仔都未生，就已經諗定第時讀邊間學校好，不過佢就話同太太一樣對於生仔生女都無所謂：「有咩所謂呀，生咗出嚟先算啦。」會唔會將生仔定為今年首要目標？佢話：「咁又唔會，同工作一半一半啦，你要畀奶粉之前都要搵定啲奶粉錢㗎。」

精選娛聞，喺晒《娛果》
http://fb.com/appledailyent