今日係蔡一傑嘅47歲正日生日，佢喺上環一間酒樓同粉絲搞生日派對，除咗收到花、切生日蛋糕之外，成班粉絲預備一條短片，仲講出草蜢6月演唱會嘅口號:「我要跳舞，唔跳會老。」搞到傑仔好開心！

講到生日願望，傑仔話希望送份禮物畀自己，就係想戒煙成功，佢話：「幾個月開始，我希望自己有健康嘅身體，咁演唱會可以做好啲，回饋歌迷。」傑仔仲話最想許志安同佢一樣戒煙成功：「其實我10年前戒過，係佢引我食番煙，所以我想佢戒煙成功；另外一個願望就係6月嘅演唱會順利完成，依家都有跑步練氣。」

派對當中，仲有一個慈善拍賣環節，傑仔捐出私人物件，包括水晶耳環、黃色泳褲，佢話黃色係佢幸運顏色，寓意大富大貴。問佢想籌到幾多錢﹖傑仔話：「冇預到籌幾多，其實最想帶出一個訊息就係要幫弱勢社群。」