當年今日
關於我們

【短片】【ViuTV選美退選潮】條件苛刻高質佳麗齊退出 33C彭美詩:時間上未必配合到

蘋果日報 2016/06/29 06:00

蘋果香港即時33cMercedes退選ViuTV美選D.n.A彭美詩

大台年年都搞選美,雖然年年都有人彈啲候選佳麗質素參差,不過依然有好多人去講。但係今年情況有啲特別,因為開放多一個免費電視ViuTV,除咗喺劇集、綜藝節目鬥餐死之外,又點可以少咗選美環節目。

今年ViuTV搞咗個實況選美節目《美選D.n.A.》,吸引咗唔同類型嘅女士參加,再加上不設年齡限制,本來呢個玩法都好吸引力,但係噚日有報道話,因為今次合約款好大限制,除咗拍攝期長達6個月,期間冇酬勞,比賽前接洽嘅工作亦要先同大會商量,搞到唔少人退出,呢啲仲要係高質素嘅候選佳麗。

擁有33C嘅23歲西班牙、德國、台灣混血兒Mercedes(彭美詩),喺面試當日佢嘅搶鏡度極高,個個都對佢讚不絕口,不過報道話佢因為條款問題而退選。Mercedes今日接受《蘋果》電話訪問時稱:「我冇講過話完全唔俾接job,只係佢需要拍攝嘅時間比較多,我相信佢哋係想順利拍攝,所以想參賽者騰空多啲時間俾節目。」

Mercedes仲話:「但係我之前接咗一啲工作,可能只係幾個鐘,我有同佢哋講話可唔可出一出去,不過佢哋怕影響拍攝,問我可唔可以推咗啲job,我明白佢嘅立場,但係我都好難做,因為我個客係好早已經book咗我,我又唔知佢拍攝嘅日期同時間,所以時間上未必配合到,應該參與唔到。」

問佢將來會唔會再試其他選美?佢話:「我相信嚟緊都會繼續去參加比賽,但係未知道係邊個比賽,我都想繼續挑戰吓自己,嘗試吓多方面嘅嘢,加上我自己都鍾意舞台,趁後生試多啲嘢!」

另一方面,屬同一間模特兒公司嘅「J界女神」Charlotte、Yoshi同埋Christy,佢哋嘅模特兒公司就話唔方便回應。

至於ViuTV方面,官方發言人話:「個別佳麗的言論我們不作評論,有關節目,由於《美選D.n.A.》是一個實況選美節目,拍攝需時。拍攝期間,ViuTV不會禁止參賽者如常工作,但希望她們能於事前先跟製作單位商量,以不影響拍攝進度為前提。」