國泰航空（293）前大公關莊偉茵（Quince）舊年9月過檔中電（002）擔任企業發展總裁，轉眼一年過去，市場傳聞，佢好有機會更上一層樓，不過伊人例牌否認，指自己滿足現狀，轉做中電其中一大好處，就係唔使24小時on call，早前終於可以安安樂樂坐郵輪旅行。
Quince喺國泰工作14年，已經變成生招牌，不過要轉都好快轉到，過去一年佢喺中電工作，每次公開露面，幾乎都係講慳電，被傳媒封佢做「慳電師奶」。佢笑言，𠵱家老公都係咁叫佢，佢就覺得冇乜所謂。咁快洗甩國泰形象，果然係公關好手。

最like唔使隨時候命

佢諗番以前喺國泰工作真係相當忙碌，事關當時老闆陳南祿出名勤力，半夜三更都喺度收發電郵，佢迫住都要做到咁上下。而且，基於業務性質，即使身處外地，佢都要開着手機準備隨時拆彈，「有次喺歐洲，企喺條購物街，不停同香港同事講電話處理問題」。
佢𠵱家就唔使咁緊張，今年5月「認真地」放大假，坐郵輪玩咗十幾日，其間冇乜點開電話或上網。
Quince噚日又為中電講慳電，首次為數據中心業舉辦慳電講座，推出專為數據中心而設嘅能源評級服務，畀業界了解用電情況。將軍澳工業邨越來越多數據中心，港交所（388）、中移動（941）、NTT Communication都喺度有數據中心，中電向佢哋埋手都合理。

李華華
mailto:[email protected]

《亂噏24》現正逢一至五每日更新，今周嘉賓陳淑莊帶肥佬黎同蔡瀾背包旅行遊中歐，即刻收睇： http://bit.ly/appletalk24