曾演出韓劇《急診男女》、《繼承者們》嘅30歲男星崔振赫，去年3月31號低調入伍，原本預計今年12月30號先退伍，點知去年10月佢就因為膝頭哥受傷嚴重，所以提前退伍，而崔振赫亦因為冇得履行兵役義務而十分傷心。

退伍之後崔振赫一直都未有公開露面，唔知係唔係仲養緊傷？不過今日韓國方面就傳出消息話佢復出在望，有望出演KBS嘅新劇《BeautifulMind》，之前呢部劇就力邀李鍾碩做主角，不過最終接洽失敗，李鍾碩亦落實主演另一部韓劇《W》，對於崔振赫將會出演《BeautifulMind》作為回歸之劇，根據相關人士透露：「崔振赫去年因病退伍後一直在尋找新嘅事務所，經過長時間思考後決定通過《BeautifulMind》回歸。」而崔振赫方面就承認有收到劇本邀約，但現時就正在討論中。

《BeautifulMind》係講述神經外科醫生捲入患者奇妙死亡之後，開始陷入愛情而恢復人性嘅故事，預計5月先播出。而近日因為《太陽的後裔》關係，令到醫生同軍人嘅題材都好受歡迎。