現年33歲嘅周子揚，2009年推出第一張EP，2011年加入大台做藝人，雖然到2015年約滿離開時知名度都唔叫做高，但係佢本身家境就非常富裕，爸爸周業德靠做地產生意起家，有「西貢地王」嘅稱譽，佢喺區內亦有多間商鋪，身家保守估計近億，而周子揚自己都係地產公司董事，喺大台因為緋聞影響時，佢自己仲去咗考金融、地產同保險牌，之後都做咗半年金融業，但最後發現自己最愛都係演藝事業，最近轉戰大陸市場。

家底夠晒厚嘅周子揚15歲開始學習彈吉他、打鼓及唱歌，18歲去咗美國音樂家學院Musicians Institute L.A. Hollywood 修讀音樂兩年。於香港簽約之前，就曾經簽約臺灣環球唱片，仲跟台灣著名製作人陳子鴻做過兩年嘅音樂學徒，學習幕後製作過程，每日喺錄音室寫歌、編曲等，打好基礎之後先進軍香港樂壇。