本港前冠軍騎師潘頓，自從本月初由澳洲客串完返嚟之後，頭馬五隻手指數晒，只係上次日賽憑「超凡夢想」及「包裝奔馳」捧盃贏過兩Win咁大把，剛周三谷草夜賽更零上名零獎金，輸到捧場客暈暈哋！
不過這天跑番沙田日馬，潘頓即時醒番晒，跑完第四場已經起孖，佢先於第二場為孫達志勝出3.2倍「名駒」，繼而在第四場五班草地1800米幫胡森馬房贏3.6倍「精彩時機」，兩個都係護級練馬師，這兩場頭馬對他們來說可謂雪中送炭，而兩駒都係最熱門，呢位過氣冠軍騎師，對馬迷好有交代。而潘頓贏完「精彩時機」亦仰天狂笑，似乎很滿意自己的表現。
「精彩時機」早段近乎包尾，今場後發先至，衝贏剛周三勝後匆出之冷門葉廐「大寶庫」，葉楚航馬房未能連同第三場贏「勝在煌」在內成功起孖，「精彩時機」季內四戰兩冠一亞一季，是少數胡廐演出準繩之馬。
今場第三名係「威旺財」，此駒首度於田戰上名，可惜服役踏入第三季仲未贏得，第四名係另一後上馬「尚華盛甲」，四重彩派六萬二千幾。