籌備婚禮隨時令準新人嗌交收場、精神異常，為了辦好明年底的人生大事，Joe醫生崔國榮自動減薪轉做兼職，多出的時間除了用作安排婚禮外，也會學琴行山跑10公里，自資出書寫童年。卸下沉重的白袍，DrJoe才發現，醫書、牌板和病人以外的世界，真的好大好大。
無買股票、無買樓，也沒想過開自己的診所，旁人眼中，他是非一般醫生。DrJoe99年中大醫學院畢業，今年33歲，讀完皮膚碩士，卻不做最賺錢的「去斑醫生」，閒來到同學的診所做替工，每周工作30小時。同學都覺得他「頹」，「佢哋會成日問我搵到工未呀？做乜唔返工呀？做乜讀咗皮膚又唔做美容？」他笑答：「其實每個人嘅生活方式都唔一樣。」

曾經DrJoe也是營役分子，畢業後在公立醫院骨科工作三年，醫院規模小、人手也緊絀，手術收症兩頭走，經常要替病人量血壓，回家累得無力替家中兩老開血壓計。沙士之後，他跟醫管局的合約完結，得到獎學金到德國遊學一個月，改變了他的人生，「見識多咗，眼界闊咗，先覺得工作原來真係次要。」
之後，他修了冷門的職業醫學，又到英國念皮膚科碩士，回港後為醫療集團打工，一星期做足60小時，每周只有兩個半天假期，他的同學更誇張，「佢哋有啲開咗自己診所，要守一段時間，於是一個禮拜開足七日，一年都唔使旨意放假。」他的一位大學師弟，就在開檔（私人執業）不久後發現患癌，令他下定決心把工時減半，做個「有生活」的人。
「讀醫太忙，其實心入面一直有好多嘢想試，唔想淨係得返工，父母年紀又大，加上我明年結婚，所以都想完成咗一啲心願先。」當醫生後極少運動的他，參加了今年的苗圃行動，又心思思參加明年初的10公里賽，「啲人話諗住到40歲儲夠錢先去做乜做乜，但到時又有其他原因，未必可以做。」
減工時最大的好處，就是讓他有更充裕時間籌備婚禮。「啲朋友問我，『結婚要唔做嘢嚟搞㗎咩？』我話係呀，我以前一個禮拜先放一日，女朋友又返shift，真係好唔好。」他說婚後暫時不會買樓，有餘錢還是會先去旅行，增廣見聞，「搵少啲，夠生活就算，之前有架車，𠵱家都賣咗，返工搭巴士，生活其實可以好簡單。」
記者　張嘉雯