王宗堯、周家怡、吳孟達同楊淇主演嘅電影《導火新聞線》將會喺下個月4日上映，早前佢哋喺新蒲崗一酒店接受訪問幫部戲宣傳。吳孟達達哥話差不多有兩年，冇拍過港產片，對上一部係彭浩翔導演嘅《香港仔》。佢話今次合作嘅幾位演員都從未合作過，但估唔到新人都可以演得咁穩，達哥話：「之前喺大陸同啲大陸演員拍戲，第一次拍佢哋都好有戒心、好緊張諸如此類。我發現佢哋(指宗堯、家怡同楊淇)非常優秀，完全冇呢個心態。」達哥話因為佢哋三位都好熟劇本同投入，所以冇咗壓力。

達哥仲大爆張家輝同張衛健呢兩位資深演員嘅秘密，仲賣口乖讚宗堯成個劉德華咁款，佢話：「有場戲喺街拍，環境有路人有粗口，佢都拍得好穩，成個成熟劉德華咁。印象尤深喺佢同我有眼神交流，唔容易做到，而且可以令到我有感覺。」達哥話好多人唔敢同佢用眼神交戲，好戲如影帝張家輝同張衛健都做唔到，佢話：「直情一交流就話『達哥你唔好畀呢啲眼神，我頂唔住呀』，真㗎家輝咁講呀，佢唔敢要我啲眼神，佢哋避開㗎。」宗堯話可能成日冇戲都去現場睇達哥做戲，宗堯話：「可能喺咁熟絡咗，冇咁怯場。」楊淇同家怡話同達哥冇乜對手戲，但都成日到片場偷師。