航空界最近都幾多公關人事變動，早排講過機管局大公關李雪珊計劃今年7月拜拜，新近聽聞國泰航空（293）公關部一姐，即係「幫港出聲」召集人周融太太張鳳婷（Chitty）上星期已經遞信，可能時間太巧合，佢講明想離開航空業，似係費事被人誤會過檔機管局。

紅褲仔出身　任職27年

Chitty喺2012年8月接替過檔中電（002）嘅莊偉茵（Quince）做國泰公關部一姐。
佢喺香港大學畢業後，1987年就加入國泰，由見習行政人員一路做起，屬紅褲仔出身，曾獲派駐倫敦、檳城及洛杉磯辦事處出任要職，管理公關部之前，擔任珠三角及香港營業總經理。
喺國泰做見習行政人員性質類似喺政府做政務主任（AO），每隔三數年就會被調部門。Chitty今年先至48歲，較60歲退休年齡仲有一大段距離，照計佢唔遞信嘅話，應該仲有排做，可能被調去管理其他部門。
不過，聽聞Chitty不久前已經打算離開國泰，畢竟已經喺國泰工作咗27年，佢話想離開航空業，作新發展。
Chitty應該仲有兩、三個月先至正式離開國泰，數數手指，大約喺國泰8月公佈中期業績前後，唔知佢會唔會幫手做埋業績至走呢？至於邊位接替Chitty，暫時仲未有風聲，Chitty都係上星期先至遞信，國泰管理層點都要諗多陣先卦。
不過老實講，雖然Quince已經過檔中電兩年，但一提起國泰大公關，好自然都會想起佢，Quince喺國泰做咗14年，一入去就做大公關，太深入民心了。

強國小朋友坐商務　剝光豬瞓覺

雖然話中央大力推行節儉風氣，但好多未受影響嘅強國人仍然花得豪，航空公司嘅頭等與商務艙，依然可以見到唔少強國人乘客，部份甚至一家大細，連幾歲小朋友都係坐頭等或商務艙，不過佢哋嘅行為有時都幾令人側目。
最近聽空姐朋友講起，一名內地婦人曾經帶住一名大約4歲男童，坐商務艙從香港飛北京，呢個小朋友一坐低，就除衫除褲，除到光脫脫。遇到咁嘅情況，其他乘客當然向空姐投訴，空姐上前了解，點知嗰名婦人理直氣壯，話阿仔平時習慣脫光覺覺豬，佢上到飛機想瞓覺，咪剝晒衫褲剝晒鞋囉。
空姐無計可施，唯有嗱嗱聲走去搵張被，幫個小朋友蓋好重要部位，唔得失呢位婦人，亦唔影響到其他乘客。其實成件事入面，睇唔睇到小孩重要部位都係其次，有衞生問題先至係問題，唔知邊位咁好彩，跟住坐到呢個細路個座位嘞。

李華華
mailto:[email protected]