早前香港駐京記者採訪內地結石寶寶父親趙連海嘅新聞時，俾當地居委會嘅人阻撓採訪，其中港台記者王慧蓓仲慘遭居委會嘅一個女人衝前掌摑。近日北京傳出趙連海即將獲准保外就醫，噚日去到趙連海屋企附近想話了解最新情況嘅香港記者，竟然又再遇到襲擊，有人攞住一個洗臉盆掟向記者，結果一名電視台攝影師中招，成為今個月同一地點發生嘅第二單港記遇襲事件。

保安大晒馬

話說班駐京記者噚日兵分兩路，一批去大興區趙連海本來住嘅屋苑團河苑小區，另一批就去佢被判監之後服刑嘅大興看守所睇吓有乜動靜。按照常理，看守所應該保安好嚴密，但噚日唔覺保安加強咗，相反，團河苑小區嘅前後大門就派出大批保安，趙連海家人住嗰幢樓，佈防更加嚴密。
既然保安大晒馬，入唔到屋苑嘅記者行家惟有留守大門等候。經過上次掌摑事件之後，記者自然要保護自己，尤其係注意住保安嘅一舉一動，好似喺大欖女子懲教所負責睇實Amina嘅懲教人員講笑話齋：「有乜事，塊面記住縮得快啲。」
等吓等吓，有個中年阿叔步出小區，見到記者就一輪嘴狂鬧，話班行家有好人好事唔去報道，硬係要同國家作對。對於阿叔曉以河蟹大義，八方班行家都冇佢咁好氣，諗住等阿叔口乾自動收聲，點知佢突然攞起手上一個洗面盆，掟向記者。由於事出突然又距離接近，一名電視台攝影師慘告中招，被掟中腰背位置。

上次摑記者

可能個印住傳統金魚圖案嘅搪瓷面盆唔算重，加上攝影師着住件厚厚嘅羽絨褸，所以好彩冇受傷。上次港台記者王慧蓓遇襲，新華社記者後來幫手解畫，否認居委會打人，仲反指記者圍住採訪阻住居民出入。噚日大大個盆掟出嚟，點講都冇理由賴記者，不過現場有人好快話阿叔精神有問題，事件自然冇得追究。
至於上次被打嘅記者王慧蓓，噚日就去咗看守所採訪，冇遇到兇狠喊打嘅惡人。

mailto:[email protected]