韓國女團少女時代成員允兒、《未生》男星任時完及韓版《步步驚心》男星洪宗玄主演嘅MBC新劇《戀愛中的王》，由於係「先拍後播」劇集，早於本月15號已經煞科，結束歷時半年嘅拍攝。新劇將於下月17號首播，劇組今日公開咗首段預告片。

44秒嘅預告剪接得相當唯美，劇中允兒嘅男、女裝嘅造型都有出現，而允兒、任時完及洪宗玄更一齊喺樹木中玩、傾偈，三人感情相當好。不過鏡頭一轉三人各自戴住面具及眼罩喺花燈會相遇，再之後就係三人痛哭嘅場面，唔知係咪因為任時完及洪宗玄為咗允兒而反面，搞到允兒都相當痛苦？最後更預告埋允兒及任時完有吻戲，令劇迷相當期待劇集播出。