李華華Online|海底撈再搶註商標「大Hi、中Hi、小Hi」防山寨貨
海底撈(6862)自從告河底撈侵權敗訴後,就註冊咗多個同「海底撈」相似嘅商標,包括渠底撈、池底撈、環球海底撈等,大包圍註冊晒所有同公司名有關嘅字詞。華華發現,海底撈最新又申請咗新商標,今次就係以大小分類,包括「大嗨、中嗨、小嗨、微嗨」等,防止有山寨品牌抄襲。
講到大包圍,佢地都順便註冊埋「大Hi、中Hi、小Hi、微Hi」商標,不過喺香港人眼中,「Hi」呢個字有另一個比較粗俗嘅歧義,相信就比較少人會中英夾雜咁用啦。
佢地上年申請咗過百個商標,華華已經好佩服佢地嘅諗頭,包括水域系商標有洋底撈、塘底撈、溪底撈、渠底撈、池底撈、瓢底撈;方位系商標有上海底撈、下海底撈、前海底撈、後海底撈等;朝代類商標有秦底撈、唐底撈、宋底撈等;仲有地名系商標京底撈、粵底撈同蜀底撈等,唔知遲啲會唔會再有新商標註冊呢?
-----------------------------
-----------------------------
-----------------------------
-----------------------------