武漢肺炎自1月中於香港爆發，特區政府高舉「科學為本」，拒絕封關，卻似乎一子錯，滿盤皆落索，疫情一發不可收拾，更衍生搶購潮、隔離營選址衝突等。香港城市大學專上學院助理教授黃宇軒認為，科學只是對抗疫症的指引，政府如何有效運用權力才是能否遏止疫情、應對民眾情緒的核心，形容香港人今次除要面對病毒威脅，拒絕聆聽民意的政府形同另一個市民要面對的「猛獸」，並認為03年後沙士一疫後再面對內地傳入疫症，香港應反思中國急速發展，挑戰自然規律招致「天譴」下，中港融合的風險。

記者 梁穎妍

特首林鄭月娥在全城封關呼聲高漲下拒從善如流，死撐政府抗疫工作「以科學同理論為本」，攻讀地理學博士時以香港爆發H5N1禽流感為研究題目的黃宇軒接受《蘋果》訪問時指，防疫抗疫不能僅死攬科學指引：「突發疫症最特別係科學唔夠我哋要畀嘅反應快」；處理充滿未知數的疫症，如同對付觸不到的敵人，「我哋一急，想要政府做決定，其實要做一啲科學都未指引到佢嘅決定，呢個就係政治出現嘅位嘞」，而當科學無法作出指引，政府必須作出政治判斷。

「喺疫症最見政治嘅位，係要回應傳染病（嘅）國家要具有好強大嘅力量，姑勿論民主定獨裁政府，係要顯示到你做到嘢。」黃宇軒以封關與否為例，「得意地方係而家公共衞生（政策）係唔興做打壓人權嘅措施；同疫情搏鬥，係靠公德心，靠社群精神叫大家一齊咁樣做」，新加坡與香港同樣沒有封關，「（總理）李顯龍好有型咁坐出嚟請大家冷靜，嗰種自信係需要好有魅力嘅leader去做，呢個就係政治嘅核心，不論你民主定獨裁都係令大家心悅誠服」。

反觀香港有民調顯示超過7成受訪者不滿港府抗疫表現，黃指，疫情在反修例運動持續8個月後爆發，「我哋唔單止唔信任政府，仲係進一步否定政府而自己去做一啲嘢」，搶購潮出現不是香港人低能，而是「竭斯底里咁去自保」。

他形容香港處於尷尬境況，一方面社會期望有領袖帶領抗疫，一方面卻對政府高度不信任，歸根究柢原因有二：「政府說服唔到香港人，中央政府冇隱瞞疫情？第二係疫情爆發初期冇做快速反應措施，錯失黃金機會」，包括內地入境人士強制14天隔離，「如果你冇顯得你好將市民性命安危擺首位，佢又點信你呢？政府應該以萬無一失，做多好過做少嘅方法面對疫情」。

「點解我哋仲應付多個對手？就係個政府」

相比03年，香港社會今次的抗疫意識相對政治化，黃宇軒認為原因在於中國因素，「上次沙士我哋覺得大部份問題係內在，要處理個病喺社區爆發，自己醫院爆發點樣共同去防守；而家7萬幾個cases係喺中國大陸，呢樣嘢對好多人嚟講恐懼來源係外在，正因為一國兩制喺好多人心目中破產，中港關係咁嚴峻，其實嗰個問題係外在，個恐懼會大好多」，故港府堅拒封關，即使符合現今全球抗疫共識，仍引起極大爭議，「今次武漢肺炎係有啲洪水猛獸落緊嚟（感覺），點解我哋政府唔去保護我哋呢？變成咗一個好似我哋原本已經要應付疫情，點解我哋仲應付多個對手？就係個政府」。

醫學專家認為香港人經沙士一疫，有高度防疫意識，但黃宇軒認為社會應吸取的教訓更為深層次，「每當我哋擴張發展經濟發展，文明每進一步，會有機會惹上所謂敵人：微生物敵人」，他指過去20多年其中一個急速擴張的經濟體就是中國，「全中國養豬、雞，工業化模式去養，係人類未試過養咁多動物喺咁擠逼地方，帶來禽流感、各種各樣疾病，一個國家要崛起，經濟要發展，係咪要有返相應防範意識？」他強調疫症不同天災，「疫症好多時某程度上嚟自人類野心，做咗乜嘢反撲，某程度上係一種天譴」。

斥沙士後推自由行好諷刺

歷史在重演，17年後香港再次面對由內地傳入的新型疫症，黃認為，香港應對內地急速發展應加以警惕，「如果我哋真係從沙士學到教訓，點可能喺沙士之後無幾耐搞自由行呢？其實係好諷刺。」

他慨嘆03年香港戰勝沙士，令他最深刻一幕是時任財政司司長梁錦松到蘭桂坊「攬女」慶祝世衞撤銷對港的旅遊警告，「啲醫生過咗身，戰勝係應該有悠長嘅反省時期，結果係慶祝，慶祝完一輪就係振興經濟，呢個pattern我唔懷疑有機會再出現」，認為必須反思本港經濟發展單一、一面倒的中港融合問題，他寄望反修例運動在疫情後延續，「有機會喺繼續爭取五大訴求以外，能夠講香港社會係時候反省，反省到底要點樣發展，建設一個點樣嘅地方」。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架