當年今日
關於我們

賣地賺兩億 被央視狂鬧
小小超澄清無囤地 - 李華華

蘋果日報 2009/11/04 00:00


久違嘅李澤楷,最近又見佢曝光,今次仲係上中央電視台《經濟半小時》,但唔係叫佢講經濟或者高科技,而係被人擺上枱,話佢明目張膽喺北京囤積土地。
呢個喺星期日出街嘅節目話,小小超旗下盈大地產(432)喺06年投咗北京朝陽區一幅地皮,但一直閒置,到今年8月賣咗畀上海姑爺間瑞安建業(983),大賺兩億幾港銀。
節目仲話有多間公司好似盈大一樣攞咗地王後,冇喺合同期內完成發展,而係等到地價全面上漲後轉手圖利。
3年前已準備前期施工
央視咁講,小小超自然要澄清,盈大發言人噚日話,幅地係06年初用5.1億人仔投得嘅,同年7月已開始前期施工準備。而舊年3月受奧運將舉行影響,工程暫緩,到10月先至復工,因此唔存在閒置土地問題。
呢個住宅項目座落北京盈科中心隔籬,落成後其實可以同盈科中心產生協同效應,咁點解要賣呢?盈大發言人解釋,呢個項目較細,唔適合公司發展。
不過,係人都知祖國近年經濟起飛,個個都想去大陸投資,國內樓價亦大幅飆升,睇怕盈大個盤起好之後,賣出去都唔只賺兩億,咁唔通賣地係另有原因?其實盈大8月喺賣地皮份通告都有講到,全球經濟下滑,缺乏龐大資本市場供應,因此賣地套現得到資金,好將資源投放喺日本同泰國嘅項目,咁實情可能係「缺水」囉。

李華華
mailto:[email protected]
empty
盈大賣咗京城幅地(紅圈),賺咗兩億幾港銀。 網上圖片