當年今日
關於我們

【李八方online】發叔妹夫鬧爆何君堯硬推23條「自私」 圖洗7.21黑歷史

蘋果日報 2020/03/22 15:24

劉皇發何君堯立法會選舉23條立法

武漢肺炎喺香港越演越烈之際,被腦殘人士奉為「戰狼」嘅建制派議員何君堯近日仍與幾個藍絲組織「23同盟」硬推23條立法,被質疑唯恐天下不亂。已故「新界王」劉皇發嘅妹夫薛浩然都對何君堯行徑睇唔過眼,近日接受傳媒訪問時批評何君堯此舉「成事不足,敗事有餘」,亦相當自私,唔顧建制派大局,「佢(何)想將自己嘅成功建築喺建制派失敗之上」。
薛浩然質疑何君堯突然喺立法會選舉前硬推23條,可能係想喺選舉前就其7.21事件嘅負面形象「洗底」兼轉移視線,認為喺7.21同白衣人握手嘅何君堯始終都要就事件作出詳細交代:「希望啲人唔好混淆視聽,愛國愛港唔等於你可以喺7.21事件胡作非為!」
薛浩然批評火力十足,指當日何君堯為白衣人打氣嘅影片早已網上廣傳,唔明白警察點解至今未有就何君堯涉嫌干犯煽惑罪作出調查,質疑:「係咪因為佢愛國、維護中央行使權力,就可以胡作非為,姦淫擄掠都得?」
薛認為《基本法》訂明香港政府可以自行決定幾時為23條立法,即係留咗空間畀特區政府自己決定,批評何君堯現時迫政府要即時立法等於變相指責林鄭政府無能,「作為愛國建制派,責任係維護特區政府尊嚴,你(何)而家係咪落井下石?」
佢仲話香港現時太多只識口講愛國嘅擦鞋仔,認為大家只要問吓何君堯啲老婆仔女現時揸乜嘢護照,之前送啲仔女去邊度讀書,就一清二楚:「佢點解要送啲仔去英國(讀書),而唔係去北京?近啲都可以送去深圳吖!」
-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架