韓劇《Healer》男星池昌旭近日喺亞洲爆紅，早前得到品牌Dunhill邀請來港出騷，噚日亦都得到品牌D&G嘅邀請出席喺上海舉行嘅活動，吸引咗近二百幾個粉絲喺場外等候。

不過，有時人氣太勁都真係唔係好事，池昌旭噚日就因為太多粉絲喺現場嘅關係，令場面非常混亂，搞到佢要臨時做衰人，取消出席D&G嘅活動，而佢嘅所屬公司亦都喺網上發言話：「因為粉絲比預計之中多，好難進行今次活動，為咗池昌旭粉絲們嘅安全，我哋同主辦方達成協議唔參加今次活動。我哋會盡快再安排行程同中國粉絲們見面。希望大家可以諒解。」

期後，池昌旭亦都喺自己Instagram公開咗個四格短片，片中又扁嘴又抖手，仲留言話：「掛住你哋，中國，上海，晚上，多謝，但為咗安全，我哋下次再見。」

不過，今日喺離開上海返韓國時，粉絲都可以喺機場見下池昌旭，補返數。