楊明今日幫大台新劇《心理追兇》喺烏蛟騰村拍外景,同場嘅演員仲有馬國明、蔡思貝同湯鎮業等人。監製王偉仁話,今次場戲係拍湯鎮業自殺,楊明揸電單車去救佢。試戲時,楊明都未試過發生意外,點知正式拍嗰陣,可能唔覺意側一側,左腳啱啱撞落個壆度,膝頭哥損咗,傷口都幾深吓。
意外發生咗之後,劇組為咗安全起見,即刻送楊明去醫院治理,但係唔係真係咁啱得咁橋,佢哋喺開拍前,劇組有工作人員斬咗一棵百年龍眼樹嘅其中一段枝葉,埋位就發生呢個意外,真係唔可以唔信邪。
講到復工時間,王偉仁仲係未知之數:「今次楊明嘅戲份重兼且仲係主要角色,睇咗醫生報告會畀佢休息,原本嗰個鏡頭會由搵替身上陣,等楊明好番,再搵佢補拍正面。」
同場嘅湯鎮業好坦白話,今次未拜神就開工,再加上為咗拍攝鏡頭好啲,將百年龍眼樹嘅樹枝剪走:「始終覺得唔係咁好,係人哋嘅樹,唔拜神都唔安心。」
馬國明同蔡思貝話冇見到受傷經過,不過知道佢受傷嚴重,馬明話:「我唔介意等楊明好番先補拍,反正我同TVB仲未約滿,有時間去等佢好番。」