黎諾懿今日到紅磡幫一個酸奶品牌宣傳活動做嘉賓，整個活動大部份以普通話進行，司儀黃心美當然冇問題，但黎諾懿上台時就講出半鹹淡普通話，雖然大家係聽得明白，但就畀心美取笑。

黎諾懿話自己有練習普通話，只係天資所限，仲笑說：「我普通話有料到唔係今時今日嘅事，本身有輕度語障，今日太太知道我嚟呢個活動都問我『得唔得』，不過依家係咁先可愛，我自我安慰下，其實各位聽得明已經係最大進步，四年前大家如果有睇我喺湖南衛視節目《舞動奇蹟》就慘不忍睹。」

正因為咁樣，黎諾懿計劃定未來親子活動同小春雞上堂學國語，有冇擔心語障會遺傳畀阿仔？黎諾懿話：「太太今日都不斷教我讀呢個品牌名，佢都話『死啦，第日阿仔會唔會遺傳咗你語障問題？』我太太識得四種語言，中、英、普通話加日文，希望阿仔係遺傳太太，讀書方面我諗我都好難參予教導，我負責動方面啦。」

更多娛聞，喺晒《娛果》
http://fb.com/appledailyent