HAEA醫管局員工陣線、香港人、手足︰

今日係我喺荔枝角收押所第106日，度過黑色聖誕，不想被別人祝福嘅生日同埋新年。經歷過被懲教職員使用過份武力及言語對待，有時仲冷言嘲笑，然而我冇放棄，唔可以因為被拘押而俾藉口自己休息，要繼續抗爭，因為我係香港人，I'm really proud to be Hong Konger.

去年區議會勝利，我哋光復咗區議會，當時我好怕，怕大家因為小小嘅勝利，導致大家停落嚟，甚至忽略我哋，將我哋變成condom，慶幸大家冇咁做，「和你寫」聖誕卡、「和你撐」、「和你過冬」，唔單止咁，仲有好多熱心市民前來探訪，仲寫信俾我，多謝你哋每一個，冇忘記、忽略我哋。「核爆都唔割」，多謝你哋，俾我勇氣同力量，面對每一日嘅挑戰，多謝你哋。

自稱為「香港慈母」林鄭月娥，由佢上任成為特首，一次又一次同香港人作對、挑釁，我哋都領教過，佢管治模式，去年100萬人上街，仍堅持逃犯條例二讀；200萬+1遊行後，暫緩，直至去年10月23日先至正式壽終正寢，The bill is dead，我哋領教過，佢一直鬥氣，做錯唔認錯嘅當權者。哎呀！我忘記咗佢只有柒柒柒票，根本唔配代表香港人，唔配做「香港慈母」。

最近，武漢肺炎橫行，林鄭你幾時先肯死？你仲敢同香港人鬥氣。以暉明邨作隔離營，最後以麥理浩夫人度假營作隔離，記唔記得佢講過啲咩？

我哋要求「止源頭、封關」，最後只封兩個口岸，記唔記得佢講過啲咩？醫管局員工陣線罷工一日，卻封剩三個口岸︰深圳灣、港珠澳及機場。你仲要同香港人鬥氣幾耐？

林鄭向醫療方面削減25億；前線醫護人員資源短缺，經常加班，為香港人默默無私咁付出，而你林鄭為咩？你真係夠膽死講自己為慈母？我想問你，你幾時先肯死？

就連口罩，說好的CSI口罩，1,000萬個去了哪？就連我哋都係冇口罩用，派一個都冇；唔單止咁，就連懲教職員都係用私家口罩，CSI口罩去了哪？仲有，連漂白水、清潔及消毒用品都缺，我想問肺炎萬一喺荔枝角收押所爆發，後果係點？邊個要引咎辭職？

懇求醫管局員工陣線企硬，罷工升級；而其他工會，各界為香港，為所有香港人無限期罷工、罷學，一日呢個港共霸權不倒下來，我們的下一代，下一代的下一代，都冇好日子過。大家唔好再自掃門前雪，對抗呢個滿手鮮血嘅霸權，重奪昔日光輝、繁榮嘅香港。

寫到呢度，眼淚又再流，心刺痛，好無力，好內疚，好想……好想再繼續同大家一齊抗爭，對抗呢個港共霸權。大家唔好放棄，9月光復議會，踢走建制；2022真普選，守護大家。囚得住我的身軀，卻囚不住我的思想。

香港人憤怒，報仇！
光復香港，時代革命！

阿拔
2020年2月2日

編按︰此為工黨屯門區議員林明恩收到被還柙手足的公開信，由林明恩代為投稿。如有意回信，請寄到「屯門友愛邨愛智樓地下103室 林明恩 林健翔辦事處」，註明回覆給哪位手足，以及留低電話號碼或其他聯絡方法，方便議辦跟進。

【蘋果論壇： https://hk.appledaily.com/column/onlineforum ，投稿網上論壇可電郵到[email protected]】