敏妮Talk:知識改變命運 - 溫敏妮
敏妮記得,之前喺呢個欄度提過一位年輕人,希望做到份工,可以好「他條」咁過日子,最緊要係冇壓力!敏妮聽完之後,都忍唔住搖晒頭。
前幾日同位大學教財務學系嘅教授傾偈,佢對家陣呢一代嘅學生都係搖晒頭。教授雖然有番咁上下年紀,但心中仍然有團火,日日對住一班咁嘅學生,非常勞氣。
佢同敏妮呻:「以前我做學生時,去聽talk,要一早到場霸位,預備紙筆螢光筆之外,支筆仲係有齊紅藍黑綠嗰啲四色筆,咁樣jotnotes先至清楚。不過,家陣上堂,啲學生大安旨意會有notes派,要佢jotnotes仲要預備埋白紙畀佢!」
教授除咗睇住班學生搖晒頭之外,佢近排最躁嘅係,見到一班上街嘅雷曼苦主。見到一班苦主大嗌銀行職員誤導投資者,佢就勁㷫。㷫嘅係一班攞咗財務策劃資格,或者銀行前線人員,都可能唔知自己sell嘅嘢,原來唔適合只係能夠承受低風險嘅投資者,咁就去sell。
教授係教財務策劃嘅,㷫,純粹係出於愛之深,責之切。因為一班出嚟發表意見嘅議員政黨,可能連迷你債券係乜都唔知,裏面嘅結構、點解出問題嘅來龍去脈都未搞清楚,就出嚟搵一班銀行從業員做箭靶。
教授好勞嘈話:「班議員又要出頭,但又話之前班銀行職員sell迷債時,苦主冇錄音,冇證據,好難告。OK,叫班sell過呢啲衍生產品嘅前線員工去考試,pass唔到嘅,即係唔識嘢,唔識嘢又去sell,仲唔係誤導!」當然sell嗰個要知自己sell嘅係乜,買嘅亦有責任了解自己投資啲乜。
正如教授所講,衍生工具唔係洪水猛獸,更加唔係毒藥,衍生產品就係因應市場需要衍生出嚟,好似期貨咁,如果做運輸嘅,唔靠買入期油,佢點對冲油價一旦急升嘅風險呢?同樣窩輪期權都係用嚟對冲正股風險,只係有部份投機者當係賭具,令產品變質。
敏妮成日講,賭唔係壞事,但最緊要知自己做緊乜。要知道自己做乜,最緊要就係教育。知識改變命運,雖然係老生常談,但亦係真理,投資者係時候反思。
溫敏妮
http://wanmanli.com/blogs/