山東新華製藥（719）無論係本身折讓，或相對A股折讓，都好吸引，炒落後國企，留意新華。新華最新NAV每股4.09（港元．下同），現價折讓12%，PB仲喺1倍樓下。場內有名嘅中資醫藥股，PB上兩三倍閒閒哋。又新華2010年半年度（6月底止）純利，翻咗半番到6000萬銀人仔。純利高增長，但PB同其他醫藥股仲差一大截，就真係有啲過份。
係咁易計數，新華2010年度純利維持翻半番，到近1.5億銀人仔，預期PE得9.2倍。再講，新華A股（深：000756）8蚊人仔過外，H股現價相對A股大幅折讓超過60%，炒A、H股折讓，新華亦有得諗。呢轉吸新華，以2010年度預期PE13倍做目標，集團可見4.85元，潛在回報率講緊三成半，到時，集團PB仍然低企1.2倍水位。

冠軍資產厚炒大折讓

冠軍科技（092）嚟緊星期二派2010年度成績表。好保守假定，集團年度純利Keep住好似半年度咁，出現雙位數倒退，成績唔靚仔。但冠軍最新NAV每股1.7元，資產底厚，而現價又企近03年沙士期以嚟嘅低位，折讓上84%過外，有炒大折讓嘅因素。業績期前後，短打冷吼冠軍，博折讓係咁易收窄番到80%，冠軍價見0.34元，潛在回報率講緊28%，已經有魚有肉。
錢雋