本地電子音樂組合Fabel，即將連同Nowhere Boys 、per se、ZENITH及DJ Cyrus呢幾個代表住不同風格嘅獨立音樂單位，喺嚟緊嘅星期六（8號）於九展演出一場「Anthology」音樂會。日前Fabel嘅兩位成員盧祝君（LoLo）與馮慶聰（Jimmy），聯同音樂會主辦人Jacky同Nasaki，一齊喺銅鑼灣接受《蘋果》訪問，講講今次演出主題。

兩位主辦人分別係來自商台節目《咆哮山莊》嘅Jacky，及專職打理獨立音樂網站兼樂隊Supper Moment御用髮型師Nasaki，佢哋話：「今次匯集5隊唔同風格嘅單位，到時仲會準備兩個表演台，一個樂隊舞台一個DJ台，希望帶俾觀眾一啲新嘅音樂體會。」

至於Fabel又點睇今次演出？成員LoLo話：「其實Fabel都係做獨立音樂出身，始終做電子音樂路線其實好狹窄，認識到Nasaki後佢提議我哋音樂上可以去得盡啲，係一個好好嘅啟發。」Jimmy就表示因為Fabel係一男一女組合，早前已構思希望聚集香港其他一男一女組合來一個音樂Crossover：「今次音樂會就已經有per se，係好好嘅機會可以一齊玩。」

問到Fabel嘅新動向，會唔會再有新歌推出？LoLo表示：「會嘅，但計劃係出年，呢段時間我哋會集中做好幾個Live Show，始終做幾多歌都好，最緊要係可以面向觀眾。」

最後Jacky同Nasaki都表示 ，希望嚟緊可以一直舉行唔同類型嘅音樂會：「其實我哋同步已經諗緊下一個音樂會嘅構思。」多得近年有唔少本地音樂節，聽眾有機會接觸更多唔同類型嘅本地音樂，佢哋都認為整體氣氛比以前好，但希望聽眾們繼續行前一步，接觸更多唔同類型嘅音樂。

場地提供：靜月

精選娛聞，喺晒《娛果》
http://fb.com/appledailyent