武漢肺炎│突封鎖禁足嚇親居民 「失驚無神做場show 政府太過份」
武漢肺炎乙明邨明恩樓檢疫
沙田乙明邨明恩樓上周有至少6宗確診武漢肺炎,政府突然公佈昨晨6時起,若民民未能出示政府安排的武漢肺炎檢測陰性結果手機短訊,不獲准離開明恩樓,而擅自離開者即屬違法可罰款5,000元,惟上周早有居民做了深喉唾液測試後,一直沒有收到結果短訊,以致未能出示證明,幾被禁足,不能返工被迫請假,引來居民怨聲載道。有居民直指當局突然封樓的做法好恐怖,感到好驚,「以為發生咩事,疫情嚇到驚到死,我哋好慌忙,政府太過份,做得好差,搵市民嚟玩.....我哋唔嚇得,再嚇就死!」
居民張太直斥昨天無端端被封樓,事前完全無新聞報導,「點解唔講,等我哋有心理準備」,她又指安排好混亂,「我哋已經做咗樽仔檢測(深喉唾液),冇收到短訊,就係陰性啦,噚日又話要再檢,我因為做咗冇再理佢。」她雖未能出示短訊,但被登記身份證及住的樓層後都可離開。「我同職員講17號已交咗樽,驗咗,驗都唔係問題,但又唔畀結果短訊,通知上非常混亂。」
被問到封樓一日後,今日又可自由出入能起作用嗎?張太說「有好多人懶惰唔去驗,驗咗安全啲,但唔好失驚無神嚟封樓,警察又嚟,其實貼張紙喺度,講明唔驗就罰5000元,市民最驚罰錢。」她指很多街坊認為昨天封樓禁足是一場show,「突然失驚無神,6點鐘就話唔准人走開,阻住好多人,返工都返唔到,我仲以為我層樓突然好多確診,以為大爆發,好驚!」她指昨晚才收到當局補發的陰性結果短訊,批評當局「後知後覺」。
陳先生一家人上周亦做了深喉唾液測試,但至今沒有收過有關結果的短訊,他指當局昨日的做法「好突然」,「最初感覺好緊張」,封樓18小時今日凌晨又突然撤走,陳先生直言「感覺上係示範畀人睇,其實作用唔大,都係好似做一做畀你哋啲人睇,叫做嚇吓你哋。」他指做了檢測會較安心。
李先生指昨日的封鎖措施,令返工的人士受阻,「(政策)OK嘅,一定要咁做,冇辦法,有阻嚇性,但突然封,就爭咗小小,應早啲通知幾時嚟封樓。」他認為有關措施應一視同仁,「應該全香港九龍都要做,豪宅發生事都要封!好似跳舞群組唔戴口罩,擴散咁大,唔只係檢測,應該罰佢哋錢,一個政策應該全部都要做,唔應該單單貧民區就捉得咁嚴,有錢豪宅就求其。唔得㗎,可能堅道好多都有(確診者),咁點解唔封佢哋樓呢?」
現時明恩樓已沒有職員在樓下放置櫃枱檢查居民出入,附近球場的臨時檢測站亦沒有開放,沒人駐守。惟邨口對開有渠務署外判公司工作人員,在坑渠抽水檢測病毒數量。
居民張太指政府失驚無神封樓做法過法,又後知後覺昨晚才補發陰性結果短訊。
李先生指港府的防疫政策應一視同仁,就算豪宅爆疫亦應封樓。
-----------------------------
-----------------------------
-----------------------------