滙豐後日（周二）喺香港舉行非正式股東大會，以往年年都有百多二百名忠心小股東出席。據聞，今年報名情況空前，破晒紀錄，滙豐高層都要諗吓計，將舉行會議嘅二十八樓，用埋平常放茶點嘅側翼，招呼啲股東。
八方好奇打聽，點解今年出席率咁踴躍。消息話，可能同主席艾爾敦退休有關，事關唔少公公婆婆股東係佢fans，這批有心人，或者想趁股東會同敦哥哥道別，存誼一番；另一個可能原因，係今年集團派息不俗，不排除有小股東前來歌功頌德一番。

香港股東夠溫情

滙豐行政總裁葛霖當日會來港主持非正式股東會，獅子行中人話，喺英國舉行嘅股東會，同香港真係天淵之別，嗰邊已有工會號召英國員工喺股東大會日罷工，每年提問環節，主席龐約翰都會面對來自環保、婦權、社會活動分子背景的小股東，千奇百怪嘅刁難問題，真係少啲急才都唔得。相反，香港嘅小股東就溫情得多，頂多問兩句派息，重常常出其不意大讚各位高層領導有方。
講開敦哥，滙豐部份員工，前晚（周五）喺馬會同佢舉行歡送會，有良心賓架之稱嘅敦哥，近期都收到唔少紀念禮物，祝福佢退休生活美滿。

傳真︰2623-9278
電郵︰[email protected]