生B冇耐嘅楊張新悅，話咁快已經坐完月，今日現身金鐘出席sisley唇彩活動。

早前薛芷倫生日派對上流傳了一張有楊張新悅同袁詠儀合照，標題係世紀合照。件事真係要追溯到97年。出事電影係馬偉豪執導嘅《戇星先生》。當時拍緊一場戲，袁企前面，後排就係張燊悅等人。拍拍吓袁感到身後有人不停咁推佢，當時氣氛好差，又已經夜深，拍到個人好躁，於是袁就擰轉身喝停佢哋，叫佢哋唔好再推。「只係記得自己擰轉面大嗌：『你哋唔好推我喇！』嗰一刻冇話指定係鬧一個人，係我唯一嘅一次鬧演員。」靚靚表示當下馬上停機，點知有人走埋嚟問佢：「點解發脾氣呀？如果嗰個係爾冬陞，你會唔會咁樣發脾氣呀？」

2001年，張新悅接受專訪時，被問到圈中同佢有牙齒印者甚多，佢就話：「從前我剛入行，滿腔熱誠，不論何時何地都希望結識新朋友。試過同某女星第一次打招呼，佢唔睬我，第二次我再會主動，佢仍然唔理我嗰陣，我就唔會再打招呼，因為尊嚴唔會有第三次。」（新聞連結：　 https://bit.ly/2IkEOAJ　）

好喇，依家「世紀合照」影埋喇，張新悅有咩回應？佢對於薛芷倫嗰句「世紀合照，世紀大和解」似乎…唔係好領情。佢話：「唔知咩一回事，最慘相張搞到我好似膠面咁，好多p圖，其實我哋皮膚好靚。」言下之意，係咪想講薛芷倫P圖……

同阿靚幾耐冇見？佢話：「我哋事實上20年冇見，拍完第一套戲就冇見過，我都冇喺娛樂圈十幾年，其實大會仲有好靚相，不過fanny攞咗呢張呢post。」

當日聚會上，楊張新悅表示有同阿靚傾偈，否認大家有恩怨，但就話：「拍戲時係有好多嘢發生，但自己都生咗四個小朋友，已經唔記得，嗰日係以媽媽身份同阿靚互相傾湊仔經，冇乜特別，佢個人都好爽直。」使唔使交換電話再做朋友？佢就話：「唔使交換，依家social media要搵就實搵到，何況自己都好忙，自己嘅朋友都未得閒維繫。」

係咪薛芷倫想拉攏你哋做番好朋友？楊張新悅稱：「從來冇需要拉，大家冇做過任何嘢，Fanny（薛芷倫）擺相係佢嘅決定，我最傷心張相咁膠面，好想拎張靚啲嘅相畀佢睇，膠面好核突，暫時冇需要，廿年後先啦。」

精選娛聞，喺晒《娛果》
http://fb.com/appledailyent