現年35歲嘅賈曉晨（JJ）前年元旦同拍拖三年、現年46歲嘅「力王」樊少皇結婚，上年11月更為老公誕下得意B女。樊少皇向來新聞多多，除咗同JJ拍拖時，被爆同前任女友育有一子一女，前年又有財務公司踩上JJ寓所追債200萬。事後樊少皇透過工作室澄清，指欠款係友人所借，朋友亦告知已經還清債款。
不過，最近樊少皇又再被追數，住喺將軍澳嘅讀者張先生日前就向《蘋果》報料，話近日喺信箱發現有一封信。張先生話：「封信係用郵票寄嚟，唔係就咁放入信箱嘅，入面有樊少皇張相，同埋寫住『欠債還$』，唔知點解會寄咗嚟我度，張紙寫嘅係一個相連單位，但冇寫幾多樓。」

「債主」冇留聯絡方法

對於老公再被指欠債，JJ透過經理人回應：「我哋知道有人周圍send，有啲公司都收到，但係如果要追債，點解冇留聯絡方法？以我所知係佢（樊少皇）之前幫一個品牌做代言，然後中間嘅公司收唔到個客錢，所以就去追佢，但如果真係要追債都會留聯絡方法，所以唔知佢乜嘢動機。」
撰文：馮仁昭