吳業坤同鄭世豪今日到新城做訪問，其實兩個人嚟緊都分別幫新城做嘉賓主持，今日就係坤哥做主持，請咗世豪做嘉賓，順便幫對方宣傳佢新歌，世豪話：「今次新歌叫《完場前》，多謝坤哥舊年寫咗一首《仍堅持》畀我，今年就自己寫咗呢首2.0，內容都係有正面永不放棄嘅題材。」

今日見到坤哥皮膚黑咗好多，佢話因為替劇集《誇世代》拍咗一日出海戲：「嗰日係煞科戲，全日都喺船上面拍， 出到去蒲台島原本拍嗰度風景好靚，但因為前幾日話有污染所以水面好污糟，又有油污又有膠粒，我仲要落水。 」佢仲搞笑咁話：「我要夾實晒全身嘅窿先夠膽落水，但結果頸後都係皮膚敏感。」

另外，坤哥日前喺社交網Post出一張差唔多係全裸，只圍白色毛巾遮住Pat Pat嘅相，唔少網民求正面圖，坤哥話：「唔好啦，等我練大隻啲先啦，我上網睇過有教學，可以練下身。」下身都有得練？坤哥即刻戴頭盔：「練肌肉呀，練走個肚腩啫。」不過坤哥po咗條動態片，見佢噚日喺遊艇上享受涼涼海風吹，吹起佢頭髮，露出高額，髮線越來越高，唔知坤哥遲啲會唔會變成「側田2.0」呢?!