差餉物業估價署公布《香港物業報告二○○四》，內載數據顯示（一）○五年私人住宅單位有二萬二千個，係九八年後新低；（二）○三年住宅空置樓仍有六萬八千個，創過去十年新高。
大部份報紙要唱好樓市，爭取廣告，於是強調供應量大減，豪宅奇缺，重要全版或頭版報道㖭。《蘋果》橫掂點講，都係被歧視，所以見到呢段新聞只係擺喺財經版下面，標題：「私樓空置率6.8%，15年最高。」總之各取所需，睇你鍾意報告好消息還是壞消息。

地產C打電話嚟講其他嘢，順便提到：「喂，《蘋果》應該唱好一啲啫！」左丁山笑佢：「又唔見你落廣告！」地產C話：「你有所不知，我哋都做好多內地地產項目，兩年前已收到通知，所有內地樓盤廣告唔准落《蘋果》，試過用Agent名義落咗一次，我俾人教訓咗一輪，以後咪搞嘞。」地產C非常老實，有碗話碗，但佢又驚肥佬黎因缺乏廣告而執笠，令佢冇報紙睇，心情幾矛盾噃。
後來問分析E：「水杯半滿，水杯半空，任你講，你點睇？」分析E話：「我曾經睇得好好，但估唔到豪宅呎價一步到位，已超出我預測嘅目標價，所以現在猶豫緊。唔少外國公司現在改變海外僱員（expat）租屋政策，以前每個月代僱員交十萬銀租金嘅，現在改為畀八萬蚊，任僱員分配，僱員就會用五至六萬租樓，淨袋兩至三萬cash，所以豪宅租金難以維持一個goodyield，加上有加息壓力，冇yield就冇二萬元呎價嘅支持力，我驚驚哋㗎。」如此說來，睇定啲冇蝕底。