【01:05更新】新增動新聞
【15:42】新增村民及狗主訪問

今早約10時半，荃灣大橋村對上山頭，一頭約1.5米長、1米高的小牛被發現墮進引水道被困，消防員接報到場，用繩綁住小牛身軀，花近個多小時將牠拉上行人路，惟小牛禍不單行，復被一頭黑白狗追咬，幾經辛苦終成功獲救，惟身體多處擦傷。

好心報案的英姐是附近村民，她當時正拖著領養得來的黑白色狗「黑仔」散步，看見小牛墮引水道便報警求助，惟她稍後帶「黑仔」返回村，之後與村民閒聊起來，「雞啄唔斷」，未有察覺「黑仔」獨自蹓返小牛墮引水道現場，並一直「監控」著救牛情況，當小牛由消防員及附近地盤工人拉返行人路一刻，一直「虎視眈眈」的「黑仔」，突然衝上前狂咬小牛頸及後腿，消防措手不及，來不及阻止，小牛不斷掙扎，「黑仔」又咬住唔放，小牛與「黑仔」最終齊齊碌落6米下山坡，「黑仔」還不時追咬小牛後腿，小牛不斷發出哀鳴。

消防及村民用樹枝拍打試圖嚇走「黑仔」，有村民用雨傘拍打「黑仔」頭部，但「黑仔」仍死口不放，消防無奈剪斷繩索，讓小牛自由行走，希望籍此逃離「黑仔」魔掌，最終小牛脫離「黑仔」，各自爬回行人路，漁護署人員將小牛綁在大樹上，觀察其傷勢，為牠的傷口噴上藥劑治療。

有男村民表示村內外山頭有數百隻野牛，昨晚11時許，已見大群野牛行過，「昨日落大雨，條路太窄，可能逼過頭，其中一隻跌咗落渠，起唔番身，呢度起碼跌過5、6隻牛落去。」今晨英姐行過見到小牛，諗住好心報警救牛，未料自己養的「黑仔」竟差點咬死牛。

英姐稍後接獲村民電話，氣急敗壞趕來救牛現場，獲悉「黑仔」惡行，頻說「佢咁抵死呀！」「佢以前冇追過動物，冇試過咬呀，佢咁衰㗎，我搵佢搵唔到，佢平時好乖，未試過襲擊人同動物，我地都係領養佢番嚟，有晶片的。」她拉著「黑仔」離開，深怕漁護署人員會將牠帶走。

漁護署人員一邊用噴霧藥物治理小牛的傷勢，一邊輕撫小牛眉心安慰受驚的牠，明顯可見小牛後腿及頸被咬傷，小牛經治療後獲放行離開。

你敢爆，我敢獎！ 即Call《蘋果》24小時爆相爆片熱線 ：63836568