今次日馬（28日）沙田編跑十場，全草地賽用C跑道角逐，莫雷拉演出飄忽，反而潘頓近期表現好穩定，次次有馬贏，晨課表現又積極，一到場操馬，今期手握重兵，會繼續有馬贏。

第二場五班1600米，「育成天下」在上手馬房養得好，可惜陣上表現失望，轉投沈廐帶來新鮮感，一出即在1400米爆冷奪勝，姿態甚輕鬆。接着以後備身份補出，跑泥地短途都追近，可能連拼兩仗，上回因右前腳不良於行退出，亦趁此機會來個小休，約停課了一星期，相信問題不大。今次復出，操練工夫正常，埋門拍番課，末段以勁勢趕過廐侶，狀態對辦。用巫顯東減五磅有助，初跑田草1600米，谷草1800米都近過，絕對無問題，超班之馬應可再建一功。

「勇晉神駒」上仗配莫雷拉取勝，復課維持正常操練，試閘及拍跳，但唔心急再跑，今次相隔兩個月復出，體力佔優，換上田泰安，易發揮之馬，排三檔用均速且留且放，入三甲機會甚高。

「辣得寶」近仗體重不斷上升，跑得唔好，今次體重回落是好現象。「行善積福」早前跟「紅衣優駿」跑近，今次落五班，即轉用大師傅搏殺。「津津樂道」老馬狀態尚可，用莫雷拉，可能是賀賢配合馬房強陣出擊。

第四場四班1200米，「七十七十」型格吸引，超過1100磅夠晒件頭，由潘頓一手操練，做足工夫才派遣上陣，親自試三個大閘，當中兩次是快活谷轉彎路程，既展現速度，亦試過刻意留後，直路在內檔慳位，輕輕鬆鬆加速竄上，已反覆仄準。此駒是新種馬，來自澳洲，父系取勝路程是1100至1400米，贏過三級賽，初出跑1200米，絕對合適，排三檔形勢亦好，有機會一出即勝。

「霸勝」粗壯肉身馬，上仗做足工夫，加眼罩跑1000米，追入亞軍負於「新強勇駿」，水準唔錯，復課保持好進度，收身線條紮實，快試火旺墜手，論馬有速度，排二檔有助發揮。

「八十八十」三戰同程一冠兩亞，有根有據，復課如常操練，試閘考驗有追勢，配搭完整，是坐位望贏之材。「有斐君子」初出，來自羅富全馬房，狀態僅屬初起，還帶點稚嫩，但試閘受騎，有股蠻勁好肯追，是半冷佳選。「肥仔」重返呂廐，試閘表現唔曳。「好友營」試閘夠速度，排4檔有助。「永旺喜喜」身靚拍跳走勢爽勁，都是邊線爭勝馬。