鄭秀文（Sammi）噚日現身銅鑼灣時代廣場，出席「米奇90周年展覽」開幕活動，佢仲同米奇老鼠互動，不但手拖手，米奇仲親親Sammi臉頰，Sammi話：「米奇老鼠好有活力，畀到人好多希望。」
問Sammi會唔會想喺迪士尼樂園補辦婚禮，佢話：「暫時冇呢個考慮，喺迪士尼搞婚禮係一個美好回憶，因為好多新娘都鍾意米奇老鼠。」對於被笑係咪因為鍾意「老鼠安」許志安而獲邀請，Sammi話：「唔關事，因為自己有童心，而且今年係米奇90周年。」咁屋企隻「老鼠安」靚啲，定係現場呢隻老鼠靚啲？Sammi就話：「梗係呢隻靚仔啲，同埋佢畀到希望人，見到佢好開心。」

堅持早起

Sammi話因為工作關係，噚日朝早5點起身做運動：「平時有早起嘅習慣，如果5點需要化妝，3點就會起身，雖然係辛苦，講咗要做就會堅持。」佢仲話最強颱風「山竹」日前襲港時留喺屋企：「屋企露台有鐵閘攔住，我一路留意新聞，香港好多人好慘，甚至受傷，見到海面好多垃圾膠樽，經過今次令大家提高環保意識，睇到大家互愛精神，但係打風真係好可怕，打風翌日我要做嘢，坐公司交通工具遇到好多樹塌。」
撰文：馮仁昭