趙學而、王宗堯、鄧一君今日係銅鑼灣現身，為一個保險公司短片「現在說未來」大玩街頭挑戰賽，王宗堯同趙學情侶檔第三次合作，拍呢個廣告已經係第7集，學而話：「睇番自己好唔慣，咁斯文，我係大家心目中好巴渣，好似係皆大歡喜裡面形象咁，但係我覺得好親切，套劇都二十年。」

趙學而啱啱去美國登台，咁啱遇到啲不愉快嘅事，佢話：「好難忘經歷，三藩市，我哋坐架車俾人仆爆咗架車，俾人搶咗個袋，係當地照顧我哋嗰個人，有追車，都好驚擔心有危險，但係太快喇！始終人生路不熟。」王宗堯就話最緊要係個電話，記者問佢係咪電話有好多唔見得光嘅野，佢話：「唔係，入面有好多電話聯絡同訊息，人大咗記性差。」

已屆41歲，現職保險高級財務策劃師鄧一君接受訪問時就謂：「都好少出嚟，多數係接受財經雜誌訪問，TVB都有搵我拍劇，話我冇戲癮就假，都轉型三年，心入面都想拍，不過等退休喇！或者到時做咗爸爸。」咁點樣止戲癮？「有0架，同事一齊自發寫劇本，導演監製拍攝自己做晒，Facebook播，健康資訊嘅嘢，好認真0架！」

更多娛聞，喺晒《娛果》
http://fb.com/appledailyent