鄭秀文（Sammi）加盟東亞娛樂後，成兩年都冇乜搞作，點知上月初楊千嬅加盟做咗同門之後，Sammi即時出山，慌死俾人霸咗地盤咁款，加埋同公司嘅何韻詩、衞蘭在內，是非日日新鮮，十足十連續劇咁，難怪有人話佢哋好似劇集《金枝慾孽》裏面四位妃子咁玩爭寵，至於邊個係皇帝？咪就係老闆林建岳囉！

同台演出

馮仁昭收到風，最近Sammi同千嬅已經鬥到去加拿大，事緣今個月25號喺溫哥華舉行嘅《四海一心加港情》，大會想邀請Sammi去表演，起初佢都推，點知當知道千嬅應承咗去之後，即刻轉軚話參加。到時Sammi同千嬅同台演出，仲有千嬅個緋聞男友側田，相信應該會幾好睇。
馮仁昭打電話畀東亞娛樂發言人梁小姐求證，佢承認Sammi同千嬅都會去溫哥華演出，但就話佢唔係因為千嬅而答應，佢話：「Sammi已經出番嚟做嘢，𠵱家忙緊錄新歌，接騷好正常。佢知道有呢個show，見係慈善演出，咁咪去唱吓新歌囉，大家唔好咁敏感啦！」