跑步男跑入啟德隧道，隧道公司巡邏車閃晒燈勸佢上車唔領情？張先生下晝1點半左右，揸車沿東九龍走廊經啟德隧道向九龍灣方向行車，當佢沿左線駛入啟德隧道，見到前面有架隧道巡邏車閃晒燈，佢都收慢啲睇吓乜事，冇幾耐見到左邊路壆上面有個着黑色衫褲嘅男人喺度跑步。

張先生話巡邏車追上跑步男之後，司機減速兼間中就揮揮手好似叫跑步男上車咁，但係跑步男就耍手，剩係指住前面，好有決心要繼續向前跑咁。啟德隧道全長1.26公里，司機揮咗幾次手，跑步男都冇停低，兩分幾鐘話咁快見到出口，有個職員已經企咗喺度截住跑步男帶佢走。

因為呢件事，左線喺巡邏車後面嘅車都要慢駛，交通有少少阻塞。張先生以前搭巴士經獅隧亦都見過有人喺隧道跑步，嗰次獅隧有廣播話隧道入面有事故，叫司機慢駛，但今次啟德隧道就冇廣播，唔知係唔係太短時間嘅關係呢？但張先生認為盡早有廣播提醒司機比較好，因為後面嘅司機其實唔知發生乜事，如果徒步或跑步嘅人突然發難跳落路面或逃走係防不勝防，對於當事人、巡邏車同其他司機都構成危險。

好彩今次隧道職員截停到跑步男，隧道公司亦都有報警備案。警方了解之後，發現原來跑步男係日籍遊客，唔小心跑咗入隧道範圍，最後佢自己離開，案件列誤會。啟德隧道公司職員話入口一向有告示牌指示行人唔准進入隧道範圍。運輸署嘅道路使用者守則亦有列出行人須知，行人不得進入「隧道區域」，「隧道區域」嘅起點同終點，都有交通標誌說明。

根據《行車隧道（政府）規例》嘅一般限制，除非獲授權人士或特定情況，否則唔可以徒步進入任何隧道，或在隧道任何部份停留，一經定罪可判罰款5,000蚊同監禁6個月。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568