Oh My Girl嘅Yooa穿上黑色露肩連身短裙現身,件衫疑似離晒罩,十分浮誇。現年51歲嘅美魔女金成鈴今日就穿上低胸吊帶長裙現身,大騷美好身材及美腿,佢喺安宰賢陪同下一齊現身紅地毯,大搶風頭,同時金成鈴大讚對方係佢鍾意嘅後輩。至於Angelababy亦有現身紅地毯,佢力谷上圍,不過養眼到就唔及金成鈴,Baby用普通話表示:「今天是我第二次來《MAMA》,好期待看今晚得獎者的演出。」問到喜歡嘅韓國歌手,Baby表示:「我是BIGBANG的粉絲。」
TWICE、GOT7、Wanna One、BTS都陸續現身紅地毯,BTS喺紅地毯台上拎咗「I SEOUL U」感謝狀,表揚BTS宣傳首爾市。車勝元同黃政民出場後,已故流行天王米高積遜( Michael Jackson)胞妹珍納積遜(Janet Jackson)就現身,身為主持嘅宋仲基壓軸現身紅地毯時,佢親民地行去粉絲堆握手,宋仲基喺台上表示:「今次擔任主持好有意義,會好好地介紹歌星出場。」又表示唔敢相信剛剛可以親眼見到Janet Jackson。問到近況,佢表示最近忙於拍劇,預計明年5月會播出,香港都好似會播。