噚晚喺九龍城就發生咗B女被擄走事件，震動全港，除咗好多網民有留意事件之外，就連唔少藝人都有關注事件，好似做媽媽嘅袁詠儀(靚靚)咁，佢就喺微博貼po謂：「全香港、九龍、新界，各區鄉親父老、阿哥阿姐，我們要總動員轉發及協助警方尋找失踨半歳女嬰，願她與父母早日團聚。警方呼籲任何人士如目睹案件發生或有資料提供，請即致電999/61480910/61480920或到就近警署提供資料。香港人你們一定做得到的！」不少藝人包括張智霖、陳法蓉同伍詠薇等等，一齊給力同祝福B女。

同樣已為人母嘅謝安琪亦於微博回應謂：「大家幫忙注意！希望早點尋回BB!求主保守!!!」其實做咗媽媽嘅佢哋，一定係關心呢件事。

而快將為母嘅陳茵媺亦喺微博話：「That'shorrible!希望快啲揾到佢！」林柏希亦謂:「緝兇重要，找回BB女更重要！如果見到有人形跡可疑，請多加留意！我跟BB及她媽媽也不認識，但也很擔心及心痛，我相信大家也是，希望她們盡快骨肉重聚！」黃日華、張松枝、張文慈﹑王祖藍﹑G.E.M.﹑黃翠如及丁子高等，亦有轉貼尋B女呼籲微博。

至於黃秋生都有喺facebook寫道：「B女被拐應該立即守關口，多數海路走，依家怕喺大陸囉！」之後佢仲回覆自己嘅發言，就話：「拐帶喺香港已經冇咗幾十年，多謝佢哋D（啲）天朝文化。」

今次事件，真係好需要大家嘅關注，好似靚靚咁講，真係要總動員去搵返B女。但網上流傳唔同版本嘅疑似B女相，其中有一張已經證實係點錯相，令BB家庭備受困擾。所以各位網民齊心搵B之餘，唔好亂咁轉可疑BB相嘅po，最好就係用番警方發出嗰張啦。